изработка на сайт от Web Solution

Որոշում 2013. իրավական պայքարն ավարտված է. Հայաստանում հետընտրական կրքերը շարունակվում են

Որոշում 2013. իրավական պայքարն ավարտված է. Հայաստանում հետընտրական կրքերը շարունակվում են
Ֆոտոլուր
Ֆոտոլուր

Հայաստանի Սահմանադրական դատարանը մերժել է 2013 թ. փետրվարի 18-ի նախագահական ընտրությունները կեղծելու մասին ընդդիմության դիմումները: Անկախ Հայաստանի պատմության ընթացքում սա արդեն չորրորդ անգամ տեղի է ունենում. ընդդիմությունը վիճարկում է ընտրությունների արդյունքները, Սահմանադրական դատարանը մերժում է հայցը, իսկ մարդկանց անվստահությունը ընտրությունների ինստիտուտի նկատմամբ աճում է:

Ավելի քան մեկ տարի առաջ Հայաստանում ընդունվեց նոր Ընտրական օրենսգիրքը, որը, ԱԺ պետաիրավական հարցերի հանձնաժողովի նախագահ Դավիթ Հարությունյանի խոսքով, հնարավորություն տվեց քաղաքացիներին վերահսկելու ընտրությունները: Սակայն նա էլ, այնուամենայնիվ, խոստովանել է, որ ՀՀԿ-ն պետք է նախաձեռնի օրենսգրքի նոր փոփոխություններ:

Դեռ Ընտրական օրենսգրքի քվեարկության ժամանակ ընդդիմությունը ներկայիս ընտրական համակարգի թերություններից մեկը համարում էր ընտրություններից հետո քվեարկած ընտրողների ցուցակները հրապարակելու պարտավորության բացակայությունը: Իշխող կուսակցությունը դրան համառորեն դիմադրում էր, իսկ Վենետիկի հանձնաժողովը խրախուսում էր այս մոտեցումը՝ նշելով, որ դա կարող է լինել քվեարկության գաղտնիության խախտում:

Այս ընտրություններում, ինչպես նաև 2012 թ. մայիսի խորհրդարանական ընտրություններում, ընդդիմությունը մեղադրում է իշխանություններին այնպիսի խախտումների մեջ, որոնք հնարավոր է ստուգել միայն ընտրողների ցուցակը հրապարակելով: Ընդդիմությունը պնդում է, որ իշխանություններն օգտագործում են Հայաստանից հեռացած, սակայն այստեղ գրանցված աշխատանքային միգրանտների, ինչպես նաև ընտրատեղամասեր չեկած ընտրողների ձայները: Ընդդիմությունը վստահ է, որ իշխանությունների ներկայացուցիչները Սերժ Սարգսյանի անունով նշված հարյուրավոր քվեաթերթիկներ են լցոնել:

«Թե իրավապահ մարմինները, ինչպես նաև ԿԸՀ-ն և ընտրատարածքային ընտրական հանձնաժողովները բացարձակ անգործություն են դրսևորել: Եթե դատարանը չի հովանավորում Սերժ Սարգսյանին, ապա ստիպված էր բավարարել մեր միջնորդությունը՝ բացել բոլոր ընտրապարկերը և տեսնել՝ ինչն ինչոց է»,- ասել է «Ժառանգություն» պատգամավոր Զարուհի Փոստանջյանը, ով ներկայացնում էր Րաֆֆի Հովհաննիսյանին դատարանում:

Կասկածները փարատելու համար իշխանությունները պետք է միայն բացեն քվեաթերթիկներով քվեատուփերը, սակայն իշխող կուսակցությունը և ԿԸՀ-ն կտրականապես հրաժարվում են դա անելուց, և Սահմանադրական դատարանը նրանց չպարտադրեց դա անել:

Մինչդեռ, նույնիսկ ԵԱՀԿ/ԺՀՄԻԳ-ի միջանկյալ զեկույցում նշվել է, որ Սերժ Սարգսյանը հաղթել է հիմնականում այն ընտրատեղամասերում, որտեղ աներևակայելի բարձր է եղել մասնակցությունը` 80-100%: Մյուս բոլոր ընտրատեղամասերում ձայների մեծ մասը հիմնականում ստացել է Րաֆֆի Հովհաննիսյանը, ով նույնիսկ այս դեպքում ստացել մոտ 37% ձայն:

Տարածաշրջանային հետազոտությունների հայկական կենտրոնի ղեկավար Ռիչարդ Կիրակոսյանը երկրում հետընտրական իրավիճակը գնահատել է մեկ բառով՝ ճգնաժամ: «Խոսքը վստահության ճգնաժամի մասին է, ընդ որում ոչ միայն իշխանության, այլ նաև ընդդիմության նկատմամբ, որի առջև ծառացած են որոշակի խնդիրներ»,- կարծում է քաղաքագետը:

Իշխանությունները մեղադրում են ընդդիմությանն այն բանում, որ քվեարկության ընթացքում խախտումների մասին բավարար ահազանգեր չեն հնչել, և Սահմանադրական դատարանին նույնպես փաստեր չի ներկայացրել: Ընդդիմության ներկայացուցիչները ընտրական հանձնաժողովներում իրոք ստորագրել են քվեարկության վերջնական արձանագրությունները: Ինչպես պարզվեց, օրենսդրության համաձայն՝ արձանագրությունը չստորագրած ընտրական հանձնաժողովի անդամին չի չի տրվում նրան հասնող աշխատավարձը: Եվ իրենց աշխատանքի դիմաց գումարը ստանալու համար հանձնաժողովի անդամները ստորագրել են արձանագրությունները:

Մեկնաբանելով դատարանի այն դիտարկումը, որ Հովհաննիսյանի կուսակցության վստահված անձինք չեն ապահովել քվեարկության գործընթացի պատշաճ վերահսկողություն և չեն օգտվել քվեարկության արդյունքները վիճարկելու իրենց հնարավորություններից, «Ժառանգության» ընտրական շտաբի փաստաբան Կարեն Մեժլումյանը հայտարարել է, որ այն ընտրատեղամասերում, որտեղ Հովհաննիսյանի ներկայացուցիչները կարողացել են հետևել գործընթացին, «Ժառանգության» առաջնորդը հաղթել է: «Այնտեղ, որտեղ բավարար վերահսկողություն չի եղել, գործող նախագահ Սերժ Սարգսյանը ստացել է 90-100% ձայն»,- ասել է նա:

Սահմանադրական դատարանի որոշումից հետո ակնհայտ դարձավ, որ Սերժ Սարգսյանն այս ընտրությունները համարում է ավարտված, սակայն փորձագետները չեն բացառում, որ իր պաշտոնավարման երկրորդ և ըստ Սահմանադրության՝ վերջին ժամկետի ժամանակ նա կնախաձեռնի հիմնարար օրենսդրական բարեփոխում: Նույնիսկ կարծիքներ կան, որ Սերժ Սարգսյանը կարող է համաձայնել խորհրդարանական կառավարման անցնելու «Ժառանգության» պահանջին՝ նախագահական ժամկետի ավարտից հետո դառնալու խորհրդարանական հանրապետության վարչապետ:

Leave a Reply

css.php